راولپنڈی: پی ٹی آئی چیئرمین کے خلاف سائبر کیس کی سماعت بغیر کسی کارروائی کے ملتوی کردی گئی۔
سائبر کیس کی سماعت کے موقع پر پی ٹی آئی چیئرمین کے اہل خانہ، قانونی ٹیم، بہنیں علیمہ خان اور عظمیٰ خان، ایف آئی اے کی ٹیم اور پراسیکیوٹرز اڈیالہ جیل پہنچ گئے۔ اس کے علاوہ شاہ محمود قریشی کے وکیل بیرسٹر تیمور ملک، ان کی اہلیہ مرین قریشی اور بیٹی مہربانو قریشی بھی اڈیالہ جیل پہنچے۔
اس دوران آفیشل سیکرٹ ایکٹ خصوصی عدالت کے جج ابو الحسنات محمد ذوالقرنین بھی اڈیالہ جیل پہنچ گئے۔ بعد ازاں عدالت نے سائبر کیس کی سماعت بغیر کسی کارروائی کے 21 نومبر تک ملتوی کر دی۔ ایف آئی اے کے اسپیشل پراسیکیوٹر ذوالفقار عباس نوکوی نے اڈیالہ جیل کے باہر میڈیا سے گفتگو کرتے ہوئے وضاحت کی کہ اسلام آباد ہائی کورٹ کے حکم امتناعی کی روشنی میں عدالت نے سماعت ملتوی کی ہے۔ سرکاری استغاثہ کی جانب سے آج کوئی گواہ پیش نہیں کیا گیا۔
